PM Modi-a'n council of minister-te inhmelhriattirna nei

Prime Minister Narendra Modi chuan nimin khan Rajya Sabha-ah council of minister tharte inhmelhriattirna a nei a, an hming leh an portfolio a chhiar chhuak. Modi hian Nilaini khan Lok Sabha-ah council of minister tharte inhmelhriattirna hi a lo nei tawh bawk. 

India Prime Minister-te hian sorkarna an siamfel hnuin council of minister tharte inhmelhriattirna hi Lok Sabha leh Rajya Sabha-ah an nei ṭhin a, Modi pawh hian an hming leh an hna chanpual hrang hrang chhiar chhuahna hun hi a hmang a ni.  

Narendra Modi kaihhruai NDA sorkarah hian Cabinet Minister 24, Minister of State (Independent Charge) 9 leh Minis­ter of State 24 an awm a ni. 

Session hi Thawhṭanni aṭang khan ṭan a ni a, speaker-in member tharte thutiam a lak tir. President Ram Nath Kovind chuan house pahnihah hian thu a sawiin, MP tharte chu a lawmpui thu a sawi. Ram Nath Kovind chuan sorkar chu chak takin a kal dawn a, hmasawnna kawngah theihtawp a chhuah dawn tih a sawi bawk. 

President hian 17th Lok Sabha-ah hian MP election buai­puitu - Election Commission, offi­cial leh security-te hnathawh chu fakawm a tih thu a sawi lang.