IPS officer hlui dam chhung tang turin hrem

Gujarat-a Jamnagar Sessions Court chuan IPS officer hlui Sanjiv Bhatt leh head constable Pravinsinh Zala-te chu police kuta awm laia mi pakhat thih thubuaiah nimin khan damchhung tang turin a hrem.

Bhatt thiam loh chantir a nihna thubuai hi kum 1990-a mi daih tawha ni a, hetih lai hian Bhatt hi Jamnagar district-ah hian Additional Superintendent of Police-in a awm. Jam Jodhpur khuaah tualchhung buaina a chhuak a, he buaina kaihhnawihah hian mi 150 chuang man a ni. An mi hren zinga pakhat, Prabhudas Vaishnani chu police kut aṭanga chhuah a nih hnu lawkah hospital-ah a thi a, a unaupa Amrut Vaishnani chuan Bhatt leh police dangte lakah thubuai a thehlut a, police kuta a awm laiin a unaupa hi nasa taka ngaihsak a ni tih a sawi. 

Kum 2011 khan Bhatt hi phalna nei loa a duty-na hmun aṭanga kal lo leh, dik lo taka official motor hmanga puhin suspend a ni a, kum 2015 khan ban a ni zui bawk. Bhatt hi kum 2002-a Gujarat-a intualvuakna thleng chungchanga Supreme Court-a affidavit a thehluhah, hetih hunlaia Gujarat chief minister Narendra Modi chu a in­hnamhnawih ve  ngei nia a tarlan avangin hriat pawh a hlawh phah hle.