PM Modi hoin Yoga Day hmang

International Yoga Day chu nimin khan ramchhung hmun hrang hrangah hman a ni a, a hmanna pui ber Jharkhand khawpui Ranchi-ah chuan Prime Minister Narendra Modi hoa hman a ni. 

Ranchi-a Prabhat Tara ground-a International Yoga Day hmannaah hian mi 40,000 vel zet an tel. He hunah hian PM bakah Jharkhand chief minis­ter Raghubar Das, governor Drou­padi Murmu, union minister of state (Independent) for AYUSH Shripad Yesso Naik leh Jharkhand health minister Ramchandra Chandravandhi-te pawh an tel. 

PM Modi chuan yoga chu kum tam tak lo hman reng tawh a ni tih sawiin, yoga chu sakhua, hnam leh vun rawng piah lam thil a ni tih sawiin, yoga chuan taksa, rilru leh thlarau pumkhatna a siam a ni, a ti. 

President Ram Nath Kovind pawhin International Yoga Day chu kum 2015 aṭang khan Rashtrapati Bhavan-ah hman a ni tih a sawi, he hun hi inkhawm pangngai ang maia hman tur a ni lo a, yoga chu kan nuna peng pawimawh tak pakhat a nih theihna tur kawng siamna atana hman a ni, tiin a sawi. 

Vice President M Venkaiah Naidu chuan yoga chu school curriculum-a telh a rawt a, yoga tih ṭhin chu nunphung inthlak danglam chho zel atan pawh thil ṭul tak a nih thu a sawi. Yoga Day hian Union Minis­ter-te pawhin hmun hrang hrangah an hmanpui a ni.