LS-ah triple talaq bill thar pharh
Sorkar laipui chuan nimina Lok Sabha inkhawmah eptu member-ten nasa taka an dodal chungin triple talaq bill thar a pharh leh. Eptute chuan sorkar thiltih chu Constitution palzutna a ni tiin an sawi.
Lok Sabha term hmasaaah triple talaq bill hi pharhin pass a ni tawh a, mahse Rajya Sabha-ah dan a nih avangin a tlang zo lo a ni. Mahse nimin khan NDA sorkar chuan a term hnihnaah MuslimWomen (Protection of Rights on Marriage) Bill 2019 chu a hmasa ber atan a pharh leh ta a ni. Law minister Ravi Shankar Prasad chuan mipa leh hmeichhe intluktlanna siamna turin he dan hi siam ngei a ngai tih a sawi.
Prasad chuan he bill hi sakhaw thil lam ni loin, hmeichhiate rorelna dik pekna tur zawk a ni, a ti. Muslim mipaten awlsam taka talaq tih vawithum sawia an nupui an ṭhen theihna chungchang hi ramchhungah ṭum 543 zet a thleng tih report a awm thu a sawi bawk.
Speaker Om Birla chuan bill pharh tur hian Prasad a sawm a, mahse minister a din chhuah hma hian eptu member eng emaw zat chuan an lungawi loh thu an sawi nghal a, an ngaihdan sawina hunte a pe zui nghal a ni.
Congress member Shashi Tharoor chuan triple talaq chu a thlawp lo tih a sawi a, hemi rual hian bill chu civil leh criminal law kaihkawpna a nih avangin a duh lo tih a sawi. Sakhaw bill pakhat thlurbinga siam a ni tih sawiin, mitin hman theih tur dan siam a ni zawk tur a ni, a ti.
AIMIM hruaitu Asaduddin Owais pawhin BJP chu sawiselin, Muslim hmeichhiate ngaihsak hle a insawi siin, Kerala-a Sabarimala Temple-a Hindu hmeichhiate luh theihna tur chu an dodal leh si tih a sawi.