West Bengal-a buaina chhuak vangin mi 16 man

West Bengal-a North 24 Parganas district-a Bhatpara-ah pawl pahnih inkara buaina chhuak vangin mi 16 man an ni a, punkhawm khapna thupek tihchhuah a nih bakah venhim hna thawk turin police ṭhahnem tham tak dah luh nghal an ni bawk. 

Ningani khan Trinamool Cong­ress (TMC) leh Bharatiya Janata Party (BJP) hnuaia pawl pahnihte inkarah buaina hi a chhuak a, mi pahnih thah an ni a, midang 11 in hliam an tuar bawk. Governor KN Tripathi chuan tharum thawhna thleng chu pawi a tih thu sawiin, Bhatpara chauh ni loin, state pumah remna leh muanna siam a ngai tih a sawi. 

Buaina chhuak vang hian Bhatpara leh Jagaddal area-ah chuan nimin khan dawr leh sum­dawnna hmun dangte khar vek an ni a, internet service pawh titawp lailawk a ni  bawk. Chief minister Mamata Banerjee chuan police officer-te chu pawikhawihna thlenga inhnamhnawihte chu eng party mi leh sa pawh ni se an chungah na taka action la turin a hriattir. State sorkar chuan Barrackpore Police Commmissioner Tanmay Ray Chaudhuri chu thlakin, a aiah Darjeeling IGP Manoj Kumar Verma a dah  nghal a ni. 

Hetihlai hian BJP national secretary Rahul Sinha chuan thuneitute chu TMC mi leh sa ang maia cheah a puh thung a, Bhatpara-a thil thil thleng chu CBI chhuitir a phut thung. Buaina chhuaka hliam tuar zinga paruk chu police an ni a, thi pahnihte chu police-te silai hmehpuaha thi nia sawi a ni. Director General of Police Viren­dra chuan police-te hian van lam hawi chauhin silai hmetpuak tih a sawi a, mi pahnihte thih dan chu chhui chian mek a ni, a ti.