Member-te aubuai vangin LS inkhawm titawp

Lok Sabha rorel inkhawm, nimina neihah eptu member-te chuan tun hnaia Delhi-a buaina thleng chungchangah an lungawi loh thu sawi a, rorel thei loa an aubuai vangin inkhawm tihtawp a ni. 

Rorel inkhawm ṭan a nihin Congress member-te chu Well-ah chhuak khawmin, Delhi buaina thleng chungchangah sorkar laipui an demna thuziakte an keng a, union home minister Amit Shah chu bang turin an phut bawk. 

Parliamentary affairs minister Pralhad Joshi chuan Holi zawh, March 11-ah Delhi thil thleng chungchang chu sorkarin sawiho a remtih thu sawiin, eptu member-te chu inbengdai turin a ngen. Eptuten an lungawi loh thu an sawi lai hian Lok Sabha Speaker Om Birla chu a awm lo a, BJP member Kirit Solanki chuan rorel inkhawm hi a kaihruai a ni. Mahse eptu lam hi an aubuai avanga ro rel thei loa an awm avangin Solanki chuan inkhawm hi a titawp ta a ni. 

Nimina rorel inkhawm­ah hian defence minister Rajnath Singh, road tran­sport minister Nitin Gadkari leh Congress hruaitu Rahul Gandhi te pawh an tel.