SC-in cryptocurrency hman phal turin RBI a hriattir

Reserve Bank of India (RBI)-in ramchhunga cryptocurrency hman a phal loh chu, nimin khan Supreme Court (SC) chuan hman  rem ti tawh turin RBI a hriattir.

SC-ah hian crypto­currency zinga bitcoin pawh telin RBI-in kum 2018-a ramchhunga hman a khapna chu ngaihtuah turin petition thehluh a ni. Judge pathum Rohinton Nariman, Aniruddha Bose leh V Ramasubramanian-te awmna bench chuan Internet and Mobile Association of India (IMAI)-te petition thehlut hi uluk taka a ngaihtuah hnuah RBI-in hman phal lohna a hman mek chu ti tawp turin a hriattir a ni. Hetih lai hian crypto­currency hman phal a nih chuan mi ṭhenkhat chuan ramchhungah black marketing a tam an rin thu an sawi thung.  

Cryptocurrency hi digi­tal token emaw vir­tual currency emaw tih a ni a, bank ngai kher loin hemi hmang hian online-a pawisa in pek (transfer) zung zung theih a ni. Internet-a blockchain hmanga him tak leh awlsam taka digital assets kan tih ang chi inthleng (transfer) zung zung theihna a ni. Ramdangah chuan a bikin sumdawngten an hmang ṭangkai hle.

 

Tuin nge cryptocurrency hi siam chhuak tih hriat chian ni lo mah se, kum 2008 October thla khan mi pathum awmna group Satoshi Nakamoto chuan currency bitcoin an siam chhuak tih an tarlang a, hemi hnu aṭang hian crypto­currency tih hi hman uar chhoh a lo ni ta a ni.