Ni khatah Covid vaccine dose nuai 20 chuang pe chhuak

Ram puma Covid-19 vaccine pek hna kalpui mekah, Thawhṭanni khan mi nuai 20 chuang hnenah vaccine hi pek a ni tih union health ministry chuan a tarlang. 

January 16 aṭangin Covid-19 vaccine pek hna hi kalpui ṭan a ni a, March 8 thleng khan dose 2,30,08,733 pek chhuah a ni tawh. Thawhṭanni bika vaccine pek zingah hian kum 60 chung lam mi 12,22,351, kum 45 chin natna benvawn nei mi 2,21,148 leh, healthworker leh frontline worker vaccine dose hnihna pek mi 3,04,343 an awm a ni.

Vaccine la tawh zingah hian healthcare worker, dose khatna la mi 70,75,010 leh dose hnihna la mi 37,39,478, frontline worker dose khatna la mi 67,92,319 leh dose hnihna la mi 3,25,972 an awm a, kum 45 chunglam natna benvawn nei dose khatna la 7,01,809 leh kum 60 chung lam, dose khatna la mi 43,74,145 an awm tawh. 

Delhi-a Aam Aadmi Party (AAP) sorkar chuan hospital hrang hrang aṭangin Covid-19 vaccine chu a thlawna pek chhuah zel a ni dawn tih sawiin, hemi atan hian budget cheng vaibelchhe 50 dah a ni tih a sawi. 

Finance changtu, deputy chief minister Manish Sisodia chuan nimin khan assembly session-ah annual state budget, Rs vbc 69,000 a pharh a, budget-ah hian healthcare sector atan bik Rs vbc 9,934 dah a nih thu a sawi a ni.

"Private hospital aṭanga Covid-19 vaccine la turten Rs 250 an chawi a ngai ṭhin. Mahse mi tam tak, an  sum dinhmunin a zir loh avangin vaccine lak nan nge, ration lak nan zawk pawisa chu an hmang ang, tia ngaihtuah ngai an awm a ni. Zalenna kan hmuh aṭanga kum 75 a tlin hnuah hetiang avanga rilru hah taka an la awm hi kan duh lo a, hei vang hian hospital zawng zawngah a thlawnin mipuite tan vaccine hi pek chhuah zel kan tum a ni," a ti. 

A thlawna vaccine sem chhuahna atan hian sorkar chuan ''Aam Aadmi Nishulk COVID Vaccine Yojana'' hnuaiah cheng vaibelchhe 50 a ruahman thu Sisodia chuan a sawi bawk. Ni khatah mi 45,000 hnena vaccine pek ṭhin pawh chu mi 60,000 chinah tihpun an tum tih a sawi bawk.