Youth Congress-in an party chief atan Rahul Gandhi duh

Indian Youth Congress chuan Thawhṭanni khan an party hruaitu Rahul Gandhi chu an party chief ni leh se an duh tih lantirna resolution an siam.

Thawhṭanni khan New Delhi-ah national executive meeting an nei a, hetah hian party chief atana Rahul Gandhi an duhna resolution hi an pawm a ni.

"Kan ram dinhmun thlir chungin, National Executive of Indian Youth Congress chuan Rahul Gandhi hi Indian National Congress President atan ruat ni rawh se tiin resolution kan pawm a ni," tiin an resolution siamah chuan an tarlang. 

Congress president atana Rahul Gandhi ruat duhna thawm hi hun eng emaw chen aṭang khan a awm tawh a, kumin June thla hian Congress chuan full-time President thar an nei dawn tih tunhnai lawk khan Sonia Gandhi chuan a lo sawi tawh bawk a ni.