CSS hnuaiah medical college 157 dinna tur pawm

Sorkar laipui chuan nimin khan Centrally Sponsored Scheme (CSS) hnuaiah thawh thuma zawhfel turin medical college 157 dinna tur pawm a nih thu an sawi.

Rajya Sabha-a ziaka zawhna chhangin Health and Family Welfare Minister, Dr. Harshvardha chuan medical college an pawm tharte chu district leh referral damdawi-in awmsa behchhana siam a ni dawn tih sawiin, scheme hnuaia medical college an din turte chu district damdawi-in tihchangtlunna tur a ni nghal tih a sawi bawk.

Union Health Minister chuan an project pawm thar ang chi chu sorkar emaw private emaw medical college la awm lohna district-ahte siam theih a nih thu a sawi bawk a ni. A thawh khatna turin state leh union territory 20-a district 58-a medical college dinna tur pawm a ni a, medical college pakhat dinna turin Rs vaibelchhhe 189 ruahman a ni bawk.

Minister chuan he scheme hnuaiah hian state leh UT-te hnenah medical college dinna turin Rs vbc 7,541 chu pek a ni tawh tih sawiin, thawh khatna atana an pawm medical college 58 zinga 46 chu hman ṭan a ni tawh tih a sawi a ni.