Uttarakhand Chief Minister a bang

Uttarakhand chief minister Trivendra Singh Rawat chuan rorellai, BJP party MLA leh MP-ten bang tura an phut hnuah, nimin khan governor Baby Rani Maurya hnenah Chief Minister a nihna aṭanga banna a thehlut. 

Rorellai, BJP hian hun eng emaw chen chu party chhung lamah buaina a nei tawh a, MLA leh party hruaitu tam zawk chu Chief Minister lakah an lungawi tawh lo a ni. Hna a thawk chak tawk lo nia sawiin, a kaihhruaina hnuaiah BJP chu inthlan neih leh hunah an chak phak a rinawm tawh lo tih an sawi.

Hruaitu thlak hi duhin, central lama BJP hruaitute pawh an sawipui a, kar liam ta Inrinni khan central party observer pahnih Raman Singh leh Dushyant Gautam-te chu party dinhmunte enfiah tur hian Dehradun-ah tirh an lo ni tawh bawk.

Banna a thehluh zawhah press conference a nei a, Rawat chuan BJP duhdan anga bang a nih thu sawiin, an party-in kum li chhung state tana thawk thei tura hun a pe chu lawmawm a tih thu a sawi. Vawiinah hian BJP legislative party meeting neih a ni dawn a, Chief Minister thlaktu tur hi puan nghal a ni ang.