Sakhaw zalenna chungchanga US report siam India-in a hnawl
US Department of State-in international religious freedom chung changa report a siam chu nimin khan India chuan a pawm lo tih a sawi.
US report tihchhuah hi 'India 2018 International Religious Freedom Report' tih a ni a, sorkar laipui chu sakhaw tlem zawk, hnam hnuaihnung leh sorkar sawisel ṭhinte mipui thinrimin a huho an beih ṭhin do letna kawngah a hlawhchham fo tih a tarlang. "Hindu majority BJP senior official-te chuan sakhaw tlem zawkte sawiselna lam hawi sawiin, buaina chawk chhuak thei zawngin thu an sawi fo a ni," a ti.
Kum 2018 chhung khan India ram chhungah Hindu kalfawrten sakhaw tlem zawk, a bikin Muslim-te lakah tharum thawhna an thlen fo tih tarlan a ni a, kut tuarte hi bawng hmanga sumdawng emaw, bawng talh emawa puhte an ni ṭhin tih a tarlang.
Report-ah hian India ram khawpui ṭhenkhat, Muslim nena inzawmna neia hming thlak a nih ṭhin chungchang pawh a tarlang bawk. Activist-te chuan hetianga khawpui hming thlak a ni ṭhin hi Indian history-a Muslim-ten tha an lo thawh ve tawhna thai bo tumna niin an sawi a, hei hian sakhaw inkarah pawh buaina a siam belh phah nia an sawi thu a tarlang bawk.
External Affairs Ministry thupuangtu Raveesh Kumar chuan nimin khan US State Department report tihchhuah hi an pawm loh thu a sawi. "India ram danpui chuan khua leh tui zawng zawngte hnenah dikna chanvo ang khat vek a pe a ni. Ram dangin kan ram mipuite dikna chanvo humhalh sak an nih dan chungchanga report a siam hi kan pawm lo a ni," a ti.
BJP pawhin US report siam chu awn lam nei saah a puh. BJP media chief leh MP Anil Baluni chuan thuchhuah siamin, report chu rintlak tawk lo nia a ngaih thu a sawi. "Hnam leh sakhaw tlem zawkte beihna thlenga a phena thil inphum ru awm anga thil sawi hi thu dik lo a ni. Buaina thleng tam zawk hi tualchhung mite inkara buaina leh, misualte thiltih a ni," tiin a sawi. Prime Minister Narendra Modi kaihhruai sorkar chu mitin tana hmasawnna thlenna tur policy-ah a innghat tlat a ni, tiin a sawi.