Delhi buaina : HC-in sorkar laipui kar li hun a pe

Delhi khawpui hmarchhak lam biala Citizenship Amendment Act (CAA) duh lohna lantirna hmuna buaina chhuak avanga thi chu an pun belh zel. Nimin khan buaina chhuak vanga thi hi mi 35 an tling tawh. Thi zingah hian police pahnih an tel. 

BJP hruaitu pathum, inhuatna chawk tho thei zawnga thu an sawi vanga Delhi-a buaina pawh rawn chhuak nia sawi a, an laka FIR ziaklut tura PIL thehluh chu nimin khan Delhi High Court chuan a ngaihtuah. Chief Justice DN Patel leh Justice Chari Shankar awmna bench chuan, sorkar laipui leh Delhi police-te chu buaina chawk chhuak thei zawnga thusawia puhte chunga action an lak dan zawtin, kar li chhunga chhanna thehlut turin, a ti.

Bench chuan mipuite in­huatna chawk tho leh, a hnua nghawng ṭha lo nei thei zawnga thusawite laka FIR ziahluh chu tikhawmuang ṭhin lo turin Delhi Police-te a hrilh nghal.

 

Bench chuan BJP hruaitu pali - Kapil Mishra, Anurag Thakur, Abhay Verma leh Parvesh Vermna te thusawi video pawh tilang a, heng mite lakah FIR ziahluh a la nih lohna chhan a zawt nghal bawk. 

Delhi hmarchhak biala buaina vangin Congress chuan nimin khan president Ram Nath Kovind an hmu.

Congress president Sonia Gandhi leh prime minister hlui Dr Manmohan Singh-te pawh Congress aiawha President hmu zingah hian an tel a, memorandum an thehlut a ni. 

Thuthar thehdarhtute'n an kawmnaah Sonia Gandhi chuan buaina chinfelna tur ngaihtuah aiin sorkar laipui leh sorkarna siam thar leh chiah Delhi sorkar-te chuan ngawih an chuh zawk tih a sawi.

"Ni li liam ta chhunga Delhi-a thil thleng chungchangah hian rawtna siam turin President hi kan hmu a, mi 34 an thih tawh bakah mi 200 chuang an hliam tawh hi India ram tan thil zahthlak tak a ni. Sorkar laipui a hlawhchham zia lantirna a ni," tiin Dr Manmohan Singh chuan a sawi ve bawk.