Delhi Police sawiseltu Delhi HC judge sawn
Nilainia Delhi buaina thleng mek chungchanga Delhi Police-te sawiseltu, Delhi High Court judge Justice S Muralidar chu Supreme Court thurawn angin President Ram Nath Kovind chuan a sawn.
Ministry of Law and Justice chuan President hian Chief Justice of India a rawn hnuah, justice S Muralidhar hi Punjab and Haryana High Court-a sawnna tur thupek hi a tichhuak tih a sawi.
Justice Muralidhar awmna, Delhi High Court bench chuan Delhi hmarchhak lama CAA duh lohna lantirnaa buaina chhuak chungchanga petition thehluhte chu Nilaini khan a ngaihtuah a, ni thum chhung tharum thawhna a thleng zawn tawh chunga Delhi Police-ten buaina chhuak an thunun thei lo chu a sawisel a ni. Buaina chawk chhuak thei, inhuatna chawk tho thei zawnga thusawitu, BJP hruaitu pathumte laka FIR thehluh a la ni loh avangin Delhi Police-te a dem thu a sawi. Mahse he thu a sawi chhuah zan, Nilaini zanlai khan Delhi High Court aṭanga sawnna tur thupek hi a chhuak zui ta nghal a ni.
Delhi Police-te sawiseltu, justice Muralidhar sawn a nih chungchangah Congress party chuan sorkar laipui chu sawiselin, judicial system-a sorkar chu inrawlhin, mipuiten rinna an nghah chu an tihchhiatsak niin a puh. Mahse union law minister Ravi Shankar Prasad chuan chhang letin, February 12, 2020-a CJI kaihhruai Supreme Court collegium-in rawtna a lo siam tawh angin transfer hi siam a ni tih a sawi thung.