Mayawati'n SP nena thawhdunna a titawp

Bahujan Samaj Party (BSP) hotu Mayawati chuan nimin khan Samajwadi Party (SP) nena an thawhdunna a titawp a, inthlan awm tur dangah chuan party mala an din zel tawh tur thu a sawi. 

Mayawati chuan, "Lok Sabha inthlan zawhah Samajwadi Party awmdan aṭangin thawkdun zel ila BJP hi kan hneh thei dawn em tih min ngaihtuah tir a ni. Hei vang hian thawhdun zel hi a rem tawh loin kan ngai. Party leh movement tana ṭha zawk tur ngaihtuahin, BSP chuan inthlan awm zel tur, a lian leh a te-ah pawh party mala chuh a tum ta a ni," a ti. 

Pathianni khan BSP hian darkar hnih chhung national convention an nei a, he hunah hian Mayawati chuan Taj corridor case-ah amah phihawh tumin SP hotu hlun, Mulayam Singh Yadav chu BJP thawhpuiah a puh. Hei bakah hian SP president Akhilesh Yadav chu Yadav hnam ni lo leh hnam hnuaihnung zawkte dodalah a puh bawk. 

SP nena an thawhdun chungchang sawiin, BSP hotu chuan kum 2012-2017 chhunga Uttar Pradesh-a SP-in sorkarna an chan laia Dalit leh BSP dodalna policy an kalpui dante theihnghilh sakin, BSP chuan SP chu thawhpuiin an thawhdunna thuthlung pawh a vawng reng tih a sawi. Mahse inthlanpui zawh hnua SP chetdan chuan ngaihtuahna thar a siamtir tih a sawi. 

2019 Lok Sabha inthlanpui dawn khan UP-ah hian BSP hi SP leh Rashtriya Lok Dal nen an thawkho a, seat pawh an insem vek a ni. BSP hian seat 38-ah chuhin, SP-in seat 37 leh RLD-in seat thumah an chuh. Amethi leh Raebareli bial erawh Congress tan an kian thung.