Thla 6 chiah hun nei tawh RBI Dy Governor a bang
Reserve Bank of India (RBI) deputy governor Viral Acharya, in-charge of monitary policy department chu a term hman zawhna atana thla ruk a la nei chungin nimin khan a bang tih a sawi.
Hei hi thla ruk chhunga RBI-a hotu lian an ban ṭum hnihna a ni. Nikum December thla khan RBI Governor Urjit Patel chuan thla kua dawn hun a la nei chungin sorkar laipui nen an ngaihdan a inan loh avangin a lo bang tawh bawk. Patel ban hnu hian Shaktikanta Das chu governor atan hian ruat zui a ni.
Kum 45 mi, Viral Acharya hian nikum January 23 khan central bank hi a zawm a ni. Mahse a ban tak avangin RBI hian deputy governor pathum chauh a nei dawn ta rih a, chungte chu NV Vishwanathan, BP Kanungo leh MK Jain-te an ni.
Nikum October thla khan Acharya chuan," Sorkar chuan central bank independence chu a zahsak lo," a ti. He a thusawi hi social media-ah pawh a darh nasa hle. Tuna a banna chhan hi mimal thil vang tih sawi mah se, sorkar nena an inkar boruak pawh a ṭha tawh vak lo hle nia ngaih a ni. Acharya hi New York University Stern School of Business-ah Economic Professor-in a awm leh dawn nia sawi a ni.