SC-in Bihar sorkar leh sorkar laipui hnenah hriattirna a pe

Bihar state-ah Acute Encephalitis Syndrome (AES) vanga naupang 140 chuang an thih hnuah, nimin khan Su­preme Court chuan Bihar sorkar leh sorkar laipui hnenah hriat­tirna a pe a, he thil thleng hi sawifiah turin a ti. 

Justice Sanjiv Khanna leh Justice BR Gavai-te awmna bench chuan Bihar sorkar hnenah faina leh hriselna lama an state dinhmun te, medical facility leh nutrition lam an indaih tawk em tihte report a, ni sarih chhunga affidavit thehlut turin a hriattir. 

SC hian advocate Manohar Pratap leh Sanpreet Singh Ajamni-te ngenna thehluh beh­chhanin he hriattirna hi a siam a ni. SC-a ngen­na thehlut tute hian Bihar-a Encephalitis vei mek naupangte enkawl tura medical expert team siam thuai turin an ngen a ni. 

Bihar sorkar chuan SC hnenah hian an state-a Muzaffarpur biala AES leng mek khuahkhirh tur hian a theih ang angin hma a la tih a sawi a, tunah chuan hri leng mek hi khuahkhirh a ni tawh tih a sawi bawk. June 1 aṭang khan AES vang hian naupang 140 chuangin nunna an chan tawh a, an zinga a tam zawk chu Muzaffarpur district-a mi an nih thu state health department chuan a tarlang. Health department chuan he hri hi state chhung district 40 zinga 20-ah a leng a, naupang 600 chuangin an vei tih a sawi.