PM-in mipuite chungah lawmthu sawi
Prime minister Narendra Modi chuan nimin zing dar 9 khan video message tichhuakin, ram mipui vaibelchhe 130-te chungah sorkar thupekte awih a, dawhthei taka an awm avangin lawmthu a sawi.
Sorkar laipuiin hri darh tur venna atana ni 21 lockdown a puan chungchang sawiin, "Mi tam takin sorkar thu awihin inah kan inkhung a, hetihlai hian ṭhenkhat chuan he hri leng hi engtinge keimahni chauhin kan do theih ang? tiin an ngaihtuah mai thei thung. Mahse in hriatreng tur chu, tumahin a malin kan bei lo e. India mipui vaibelchhe 130-te chakna chu mitinah hian a awm a ni," a ti.
"Coronavirus-in hun thim tak a thlen mek aṭang hian eng lam panin kan kal zel a ngai a ni," tiin, PM chuan Pathianni zan dar 9 hian hri leng dona kawnga mipuite inthlawp tawnna leh lungrualna lantirna turin in tinte chu an light off a, bati, diya, flastlight, mobile phone torch chu minute kua chhung ti eng turin a chah.
PM chuan thil ti tura a chah hi kawngpuia chhuah khawma ti lo turin a ngen nghal a, mahse in kawtah leh balcony-ahte hun hmang zawk turin a chah nghal. Hri darh tur venna kawng awmchhun chu social distancing a ni, a ti.
Eptuten PM thusawi sawisel
PM-in a video message-a Pathianni zana bati leh thil dangte chhi tura a ngenna chu a National Congress Party chuan sawiselin, PM thusawi hian mipuite a tibeidawng hle a ni, a ti.
Maharashtra minister leh NCP thupuangtu, Nawab Malik chuan PM hian Covid-19 do letnaa sorkar hmalaknate a sawi an rin laiin, mipuite chu bati leh thil dang chhi eng turin a chah ta ringawt zawk a ni, tiin a sawi.
Congress MP Shashi Tharoor chuan Modi chuan hri leng leh khuahkhirhna siamin mipuitea natna, phurit leh sum lama an thlaphanna chungchangte chhawk zangkhaina lam hawi engmah a sawi lang lo a, lockdown a zawh hnua kal zel dan tur, hma lam hun thlirna engmah a lang lo a ni, a ti.