HC-in Rajiv Gandhi thattu court-ah a inlan phalsak
Madras High Court chuan Prime Minister hlui Rajiv Gandhi thattua puh damchhunga lungin tang tura hrem, Nalini Sriharan chu July 5 hian thla ruk chhung chhuah phalsak tura a dilna ngaihtuah hunah amah ngei court-a a inlan a phalsak.
Nalini Sriharan hian a fanu pasal neihna tura inbuatsaih nan thla ruk chhuah a dil a ni. Justice MM Sundaresh leh Justice M Nirmal Kumar awmna division bench chuan a dilna chungchang hi amah ngeiin a thlen theihna turin Nalini hi July 5, tlai dar 2.15-ah court-ah inlan an remtihsak.
Kum 27 chuang jail-a tang tawh, Nalini hian Vellore-a Special Prison for Women-a superintendent of police hnenah court-ah hruai tura hrilh tur hian a ngen a ni. Court-a ngenna a thlenah, Nalini chuan damchhung tang tura hremte chu kum hnih danah thla khat chhung chhuah theihna pek theih an ni tih a sawi a, mahse ani chu kum 27 chuang tantir a ni tawh chungin hetiang chawlh hi a la dil ve ngai lo tih a sawi. Kumin February 25 khan jail thuneitute hnenah a fanu pasal neihna tur buaipui tura thla ruk chhuah hi a dil a ni. Hei hi a nu pawhin March 22 khan a dil sak leh bawk a, mahse thuneitute lamin phalna an pek loh avangin high court-ah an thlen a ni.
Nalini Sriharan hi Rajiv Gandhi thahnaa a inhnamhnawih avang hian thi tura hremna pek a ni a, mahse kum 2000, April 24 khan Tamil Nadu sorkar chuan a hremna tihnep sakin damchhung tang turin a ti leh ta zawk a ni.