Army Colonel leh jawan 40-te thubuai siamsak

Maharashtra state-a thingtlang khaw mite vau leh tihṭhaihna atana ralthuam an hman avangin Indian Army Colonel leh jawan 40-te lakah thubuai ziahluh a ni. 

He thil thlenna hi Pune-a Rajguru Nagar hmunah a ni a, Colonel Kedar Gaikwad chuan he hmuna chengte hi ram inchuh chungchangah silai nen a vau a, a battalion-te pawh a hruai tel bawk nia sawi a ni. 

Colonel Gaikwad pa hian Pune bula thingtlang khuaah ram acre 64-a zau a lei a, a ram lei chungchangah hian khawchhunga mi Sunil Bharne nen an inti thiam lo a ni. Colonel Gaikwad pa chuan a ram leiah hian dan loin Bharne hi a awm tih a sawi a, mahse Bharne chuan he ram hi a hmain a lo lei tawh a, thlai chin nan hun rei tak a lo hmang tawh tih a sawi thung. 

June 14 khan Colonel Gaikwad pa leh Sunil Bharne-te hi an intibuai a, hemi chungchang hi a fapa, Hyderabad-a artillery unit-a Colonel hi an hriattir hnuah a battalion-a sipai 40-te nen a pate awmna khuaah hian kalin, Bharne hi an sawisak bakah khawchhung mite chu silai nen an vau zui a ni.