Modi-a sorkar chhung nawrh huaihawt kan inhuam : Farmer leader

Sorkar laipuiin farm law pathum a siam thar duh lohna lantira Delhi border-a nawrh huaihawt mek, loneitute chuan heng dan tharte hi sut a nih hma chuan prime minister Narendra Modi kaihhruai sorkar a din chhung chu nawrh huaihawt an inhuam tih an sawi. 

State hrang hrang aṭanga loneitu kalkhawmte hian Delhi border pathumah farm law thar duh lohna lantir hian ni 100 chuang nawrh an huaihawt tawh a ni. Loneitu pawl hruaitu, Narendra Tikait chuan sorkar laipuiin loneitu nawrh huaihawt mekte chu a hmetmit mai thei niin a inngai a, mahse tunhma lama tactic hrang hrang hmanga nawrh huaihawtte a hmehmih ang mai kha an ni dawn lo tih a sawi. PM Modi kaihhruai sorkar hian kum thum leh a chanve vel hun a la nei a, an thil phutte hi sorkarin a tihhlawhtling lo a nih chuan hemi chhung zawng hian nawrh huaihawt chhunzawm zel turin loneitute chu an inpeih reng a ni, a ti.

Minimum Support Price (MSP) chungchang pawh sorkar laipui chuan hman chhunzawm zel a ni dawn tih a sawi reng a, mahse hei hi ziak ngeiin a dah duh lo nia sawiin,  "LPG cylinder pawh man tlawm zawka pek a nih thu an sawi reng a, mahse tunah chuan a man tlawmna pawh an tibo leh tawh a ni," tiin Tikait chuan a sawi. 

United Kingdom Parliament-ah India rama loneitute nawrh huaihawt mek chungchang chu Thawhṭanni zan khan sawiho a ni a, hei hi India chuan a dem thu a sawi chhuak nghal. 

UK Parliament hian lo­neitu nawrh huaihawt mek chungchangah petition, mi nuai chuangin an hming an sign hnan thehluh a nih avangin debate hi a nei nia sawi a ni. Debate neihnaa MP 18 zinga 17, Labour, Conservative leh party dang member-te chuan loneitute chunga sorkar chetdan demin, internet shutdown leh activist man an ni chu an dem thu an sawi a ni. Prime minister Boris Jonson chu India sorkar pawh direct taka sawipui tura an duh thu an tarlang. PoK-origin Labour MP Tahir Ali phei chuan India sorkar hrekna siam a phut hial.  

MP zingah hian Conservative MP Theresa Villiers chauh chu India sorkar ṭan lama thu sawi a ni a, agricultural reform chungchang chu khawi ramah pawh thil harsa tak a nih thu a sawi a ni. Thawhlehni khan sorkar laipui chuan India rama British High Commissioner Alex Elllis chu koin, UK Parliament-a lonei­tu nawrh huaihawt chung chang an sawiho chu a lawm lo hle tih a hrilh. Foreign secre­tary Harsh Vardhan chuan democracy ram dang inrel­bawlnaa mawi lo taka inrawlhna a ni tiin Ellis a hrilh.