Uttarakhand CM thar atan Tirath Singh Rawat lalut

Uttarakhand Chief Minister thar atan nimin khan Lok Sabha MP Tirath Singh Rawat chu BJP hruaitute chuan ruatin, nizan khan rinawmna thu tiam tirin lakluh nghal a ni. 

State chhunga rorellai, BJP party hruaitu leh worker zingah hruaitu thlak duhna lian tak a awm a, lungawi lohna an neih avangin Thawhlehni tlai khan Trivendra Singh Rawat chuan Chief Minister a nihna aṭangin a bang a ni. 

Nimin khan BJP hruaitute chuan meeting neiin, Chief Minister thar atan hian BJP national secretary ṭanglai leh Pauri biala Lok Sabha MP, kum 57 mi Tirath Singh Rawat hi an ruat ta a ni. 

Tirath Singh Rawat hi Uttarakhand CM pakuana a ni a, Uttarakhand state a din tirh khan education minister hmasa ber a lo ni tawh a ni. Rashtriya Swayam Sewak (RSS) background nei niin, tun thlengin a la thawhpui ṭha hle nia sawi a ni bawk. Nakkumah an state hian assembly inthlan an neih dawn avangin CM dinhmun hi kum khat vel a chelh hman ang.