ILP chungchanga Meghalaya minister thusawi sawisel

Achik Youth Welfare Organisation (AYWO) chuan Meghalaya-a Inner Line Permit (ILP) system hman phut chungchangah, state mipui zawng zawng ngaihdan a in ang vek kher lo tia health minister leh BJP MLA AL Hek-a'n a sawi chu na takin an sawisel. 

Kar liam ta khan Hek hian chanchinthar lakhawmtute a kawmnaah, "ILP phuttute hi mi sang tlemte an ni a, hei hi mipui tam zawkin tiin engtinge an sawi theih? Meghalaya mipui hi nuai 33-35 vel an ni a, mipui tam zawkin ILP chungchang an ngaihdan hi ka hre lo a ni. Mi nuai 35 in an duh vek a nih chuan a ṭha a ni mai," tiin a sawi. ILP chungchanga mipui ngaihdan a in an loh avangin he thil hian an state a tih buai phah lo tih a sawi bawk. 

AYWO chuan minister hi chhang letin, "BJP hi chinghnia beram vun sin a ni. Hun a kal a, an thil tum dik tak chu a langchiang ta a ni. State minister-te chuan Delhi-a an hotute an intlawn siak a, an mawhphurhna an hre lo a ni," tiin an thuchhuahah an tarlang. 

Meghalaya Assembly-in an state-a ILP hman an duhna resolution an pass tawh chu nuihzatbura siamah Hek chu an puh bawk. NGO chuan BJP hruaitu hian Meghalaya-a ILP hman phutna kalpui chungchang chu lo zirchiangin, Delhi lama a pute hnenah theihtawpin a lo nawr ve zawk tur a ni, an ti.