PepsiCo India-in Assam-ah greenfield project siam tum

PepsiCo India chuan Lays Potalo chips leh Kurkure corn puff siamna turin Assam-ah cheng vaibelchhe 400 hu greenfield project siam a tum. 

PepsiCo india palaite chuan Nilaini khan Assam industries and commerce  minister Chandra Mohan Patowary hi hmuin, an project siam tumte hi an sawipui a ni. 

Company official-te chuan an project kalpui tur hnuaiah hian contract farming (buyback policy) siamin, loneitute hnenah thlai chi hi an pe ang a, an thar chhuah chu an hnen aṭang hian an leisak leh dawn tih an sawi. Hei bakah hian loneitute chu a theih ang anga puih an tum tih an sawi bawk. Company chuan he project kalpuina atana proposal a siam chu an thehlut tawh tih minister hi an hrilh bawk. 

Tunah hian PepsiCo India hi India ram state 13-a loneitute 24,000 chuang nen an thawkho mek a ni. 

Patowary chuan state sorkar chuan company hmalakna thlawpin a theihtawpa a lo thawhpui tur thu a sawi. 

State agriculture department chuan hma lain, PepsiCo lamin loneitute training an pekna tur pawh buatsaih a ni dawn tih a sawi a, department official-te hnenah pawh project hi a rang thei anga kalpui a nih theihna tura tihfel ngaite tihfel thuai turin a chah bawk.