Antigua PM-in Choksi citizenship hlihsak a tum

Punjab National Bank (PNB) sum tam tham tak tihchingpen sak avanga man tuma zawn mek, lunghlua sumdawng Mehul Choksi chu India ram aṭanga a tlanchhiat hnuah Antigua and Barbuda ramah awmin, an ram mi nihna citizenship pawh a nei a; nimahsela Antigua and Barbuda prime minister Gaston Browne chuan an ram chuan thil tisualtute a hum dawn lo tih sawiin, Choksi citizenship pawh chu hlihsakin, India ramah thawn kir a ni dawn tih a sawi. 

Mehul Choksi hian nikum January thla khan India ram a chhuahsan a, thla ruk hnuah Antigua citizenship a nei tih hriat chhuah a ni. Mahse hei hi an thil tihsual hriat chhuah a nih hmaa lo tihfel a ni tawh a, citizenship a dil lai pawh hian Antigua hian India hnenah a chungchang pawh zawtin, thubuai a neih loh avangin a lo pe a ni. 

Brown chuan Choksi citizenship hlihsakna tur tihfel hun chhung hi a la sawi chiang thei lo tih a sawi. Dan ang taka kalpui a ni dawn a, Choksi pawh thil tisualtu ni mah se court-ah kal a, a ṭanhmun sawi turin dikna a nei tho a ni, a ti. Mahse dan ang taka engkim kalpui a, tihfel a nih hnuah India ramah thawn kir ngei a ni dawn a ni, a ti.