Indian Army-ah indaih lohna a nasa: Defence Minister

Defence minister Rajnath Singh chuan Indian Army-ah indaih lohna a nasa a, post ruak hnawhkhah ngai hi 45,634 zet a awm tih a sawi. Heng zinga post 7,399 chu officer, Second Lieutenant rank chunglam tih a sawi bawk. 

Kum 2018 August thla khan khatih laia minister of state for defence Subhash Bhamre chuan January 1, 2018-a Indian Army-a officer awm theih zat chu 49,933 a nih laiin officer awm zat chu 42,635 a nih thu a sawi a, post hnawhkhah loh 7,298 a awm tih a lo sawi tawh a ni. 

Army-a officer indaih lohna hi sorkar pawhin a buaipui a, ṭhalaite Army zawm tura hip tumin advertising campaign-te pawh a kalpui a ni. Kum 2017-2018 aiin kum 2018-2019-ah sorkar chuan sipai lak tharna tur chungchang tihlarna atana sum a sen pawh a pung chho hle. Hei vang hian officer post ruak pawh a tlakhniam phah nia ngaih a ni bawk. 

June 8 khan Indian Military Academy, Dehradun leh Officers Training Academy, Gaya-ah Passing Out Parade neiin, Indian Army officer thar 466 an chhuak a ni.