BJP-in West Bangladesh din tumah Bengal sorkar puh

Bharatiya Janata Party (BJP) chuan Mamata Baner­jee kaihhruai West Bengal sorkar chu an state-a dan loa Bangladesh mite awm phal­sakah puhin, West Bangladesh din tumah an puh.

Hetihlai hian Bengal-a rorellai, Trinamool Congress (TMC) party chuan National Register for Citizens (NRC) leh Citizenship Amendment Bill chu hnam tlem zawkte thliar tumna tiin a sawi thung. 

Lok Sabha-a President thusawi chungchanga Motion of Thanks neihnaah, West Bengal BJP MP Dilip Ghosh chuan Bengal state dan leh thupek dinhmun chu a ṭha lo hle a, demo­cracy dinhmun pawh a him tawh lo tih a sawi a ni. 

Ghosh-a chuan, "West Ben­gal Chief Minister chuan prime minister nih a chak hle a, Bengal leh Bangladesh suihzawm a, West Bangladesh din a tum a ni. India aṭanga Bengal lakhran tumin phiarrukna a awm mek a ni," a ti. 

Hetihlai hian TMC MP Mahua Moitra chuan BJP chu kum 2014 aṭanga ramchhung hmun hrang hranga mipuite hlauhthawnna thlentuah a puh let ve thung a, Ayodhya-a ram inchuh chungchang pawh politics lama kailutah a puh bawk.

BJP sorkarna hnuaiah chuan electoral system in awmzia a nei lo chho mek a, induhsakna hleihluak tak a thleng meka ni, a ti. Hei bakah hian India rama media house lian pangate chu mi pakhat thununna hnuaiah an awm tih a sawi bawk.