Kum 2015 aṭangin IAF thlawhtheihna 33 chesual tawh

Defence minister Rajnath Singh chuan kum 2015 aṭang khan Indian Air Force thlawhtheihna 33 a chesual tawh tih a sawi a, heng zingah hian fighter jet 19 an tel. 

Lok Sabha-a zawhna, ziaka a chhannaah Rajnath Singh chuan Russia siam AN-32 aircraft chu IAF transport fleet-te hnathawhna ber a ni tih sawiin, hei hi thlak tumna a la awm lo tih a sawi. 

Kum 2015-2016 chhung khan IAF fighter jet pali, helicopter pakhat, transporter leh trainer aircraft-te an chesual tih minister chuan a sawi. 2016-2017 chhungin IAF fighter jet paruk, helicopter pahnih leh trainer pakhat an tla bawk. Kum 2017-2018 khan Air Force chuan fighter jet pahnih leh trainer aircraft pathum chu an tlak avangin a lo hloh tawh bawk a ni. 

Kum 2018-2019-ah IAF hian fighter jet pasarih, helicopter pahnih leh trainer pahnih an hloh tawh a, heng zingah hian February 27-a Pakistan Air Force thlawhtheihna nena inbei, Wing Commander Abhinandan Varthaman khalh, MiG-21 fighter jet pawh a tel. Hemi ni vek hian Mi-17 helicopter chu tlain, air force mi leh sa pasarih an thi a ni. 

Kum 2019-2020-ah IAF hian transport aircraft pakhat an chan tawh a ni. Tun thla tir lam khan AN-32 transport aircraft chu Arunachal Pradesh-ah a tla a, thlawhtheihnaa chuang mi 13-te chu an thi vek a ni.