Home Minister-in J&K-a President's Rule pawhseina resolution a pu lut

Union Home Minister Amit Shah chuan nimina Lok Sabha inkhawmah Jammu and Kashmir-a President's Rule hman mek chu thla ruk dang pawhsei rawtna resolution a pu lut. 

Amit Shah chuan J&K-ah inthlan buatsaih theih mai a la ni lo tih sawiin; hei vang hian President's Rule chu hman chhunzawm a la ṭul tih a sawi. "J&K-ah inthlan neih theih a la ni lo a, Election Commission pawhin kumin kumtawpah inthlan hi neih turin a rel a ni," a ti. 

J&K-a President's Rule pawhsei rawtna hi Prime Minister Narendra Modi kaihhruaia meeting neihnaah rawt a ni. J&K-ah hiah kum 2018, June 20 khan Bharatiya Janata Party (BJP) leh Peoples Democratic Party (PDP) ṭangrual sorkar a tlukchhiat avangin Govenor's Rule puan a ni a, December 2018-ah a tawp hnuah President's Rule hi puan zawm leh a ni. 

Amit Shah hian ni hnih chamin J&K hi a tlawh tawh a, a cham chhung hian state thuneitute  nen security dinhmunte an sawiho a, Amarnath Yatra neih tura inbuatsaih dante an thlirlawk bawk. Home Minister hian Ningani khan J&K-a police martar, inspector Arshad Ahmed Khan chhungte pawh a hmu. Ahmed Khan hi June 12 khan Anantnag-a firfiakten an beihnaah a thi a ni. 

Home Minister chuan Jammu and Kashmir Resevation Act, 2004 amendment bill chu nimin vek khan a pulut bawk. He bill-ah hian Jammu-a International Border aṭanga km 10 huam chhunga chengte leh, Kashmir-a Line of Control hrula chengte tan zirna in leh sorkar hna peknaah an chanpual tur dahsak rawt a ni.