UP Chief Minister-in dar 9-a office thleng hman lo hlawh cut sakah vau

Uttar Pradesh chief minister Yogi Adityanath chuan an state-a sorkar officer-te chu zing dar 9-ah an office thleng hman ziah turin a ti. Dar 9-a office thleng hman lote chungah action lak a ni dawn a, an hlawh pawh cut sak a ni dawn tih a sawi. 

Office kal hun vawng dik tura thupek a tihchhuah rualin, CM chuan District Magis-trate leh Police hotu zawng zawngte pawh an­mahni dawr duhtu mipui­te chu zing dar 9 leh chhun dar 11 inkara hmu ziah turin a ti bawk a ni. 

CM thupek hi UP police unit tinah thawn nghal a ni a, June 30 hmain police officer eiru leh hna thawk ṭha lote list thehlut turin a ti bawk. Police zingah March 31, 2019-a kum 50 tling tawhte chu an dinhmun enfiah an ni bawk ang. 

Nikum khan Adityanath kaihhruai sorkar hian hetiang thupek hi a lo tichhuak tawh bawk. Officer eng emaw zat chu voluntary pension-in an chhuak a, police officer zingah kum 50 chunglam eng emaw zat chu hnathawk ṭha tawk loa puhin ban an ni bawk a ni. 

CM thupek avang hian officer, a bikin police officer-te chu an lungawi lo hle a, an kal hun tur a tuk sak chuan an ban hun tur pawh tuksak turin an ti. Official-te chuan chief minister hoa meeting pawimawh an neihahte zan rei tak tak thleng hun an hmang a, zan dar 11-a an haw theih chauh changte a awm tih sawiin, hetichung hian a tuk zing dar 9-ah office thleng hman tura a beisei leh an ni chu an lungawi lo a ni. Sorkar chuan hriatthiamna a neih a ngai a ni, an ti.