Bengal police-ten CM beih chungchangah thubuai ziak lut

West Bengal chief minister Mamata Baner­jee-i beih a nih chung changah police-te chuan nimin khan thubuai an ziak lut. 

Trinamool Congress hruaitu, Sheikh Sufiyan-a'n CM beih a nih chung changa complaint a thehluh hnuah, Purba Medinipur district-a senior police officer chuan IPC sections 341 (punishment for wrong­ful restraint) leh 323 (punishment for voluntarily causing hurt) hnuaiah thubuai ziah luh a nih thu a sawi. Pawihkhawihtute hi chhui mek an ni tih a sawi bawk. 

Nimin zing khan district magistrate Vibu Goel, super­intendent of police Praween Prakash leh police officer dangte chuan CM-in beih a tawhna hmun nia sawi, Birulia Bazar area an tlawh a, thil thlen dan chhuichianna atan helai hmuna CCTV dahte an enfiah nghal a ni. 

CM Banerjee hian Nilaini khan Nandigram-a campaign laiin, mi pali/nga velin an bei niin a sawi a, na taka namin a car bangah a insawh a, hei vang hian a ke vei lam, kawng, dar leh nghawngah te hliam a tawrh phah niin a sawi. CM hi Kolkata-a SSKM Hospital-ah enkawl mek a ni. Doctor-te chuan CM hi a ngaihtuahawm lo niin an sawi a, medical test dang neih sak leh tum a ni tih an sawi. A khawsik erawh chu a ziaawm tawh tih nimin khan an sawi. State sorkar chuan Banerjee enkawl tur hian member pakua awmna, doctor team an siam nghal a ni. 

TMC hruaitu Partha Chat­terjee chuan CM chunga thil thleng chungchang hi Election Commission-ah thlen an tum tih a sawi. "Mamata kawng dal tuma beitute hi mi dawihzep an ni. Mahse tumahin an dang zo dawn lo," a ti. 

Nimina TMC-in election manifesto tlang­zarh an tum chu CM-in beih a tawh avang hian tlangzarh hun tur hi an sawn phah bawk. West Bengal assembly inthlan hi thawh riata neih a ni dawn a, a thawh khatna chu March 27-ah neih a ni ang.