Home Ministry-in Rahul Gandhi insawifiah turin hriattir

Home Ministry chuan Cong­ress president Rahul Gandhi chu citizenship a nih dan chung changah complain a awm avangin insawifiah turin a hriattir. 

BJP MP Subramanian Swamy chuan Rahul Gandhi hi British citizenship neihah puhin complaint a thehlut a ni. Hei vang hian Home Mi­nis­try chuan kar hnih chhungin Congress president hi insawifiah turin a hriattir a, a dinhmun dik tak sawichiang turin a ti a ni.

Dr Subramanian Swamy complaint thehluhah hian com­pany pakhat UK-a in register Backops Limited-ah chuan director leh secretary zingah Rahul chu a tel a, company annual return 2005 leh 2006-a file-ah pawh Rahul Gandhi chu British nationality a ni tih a inziak tih tarlan a ni. 

Hetihlai hian Congress chuan BJP in politics hmanga an beihna a nih thu sawiin, khawvelin Rahul Gandhi chu India citizen a ni tih an hria a ni, an ti. Modiji chuan unemployment chungchang­ah chhanna a nei lo, black money leh agrarian distress chungchangah pawh in­sawifiahna tur a nei lo a, chumi avang chuan thu dik lo an thehdarh ta a ni tiin, Congress spokesperson Randeep Sur­jewala chuan a sawi.

BJP hian Amethi Lok Sabha seat-a Rahul Gandhi-a nomination file pawh returning officer chuan a pawm lo tih an sawi bawk.