Varanasi bialah sipai aṭanga ban Bahadur Yadav a ding dawn

Border Security Force (BSF) sipai hlui, indona hmuna awm sipaite hnena ei tur sem a sawisel avanga ban, Tej Bahadur Yadav chu Samajwadi Party chuan Prime Minister Narendra Modi-a dinna, Uttar Pradesh-a Varanasi biala an party candidate turin an ruat. 

UP-a thawkdun, Samaja­wadi leh Bahujan Samaj Party chuan Varanasi-a ding tur hian Shalini Yadav an lo ruat tawh a ni. Yadav hian Varanasi bialah PM Modi a khin duh thu hi a lo sawi tawh bawk. SM hruaitu chuan Bahadur Yadav hi sipai aṭanga ban a nih avanga a nomination an lo cancel sak a nih chuan a thlak nan Shalini Yadav chu dah a ni tih sawiin, Shalini Yadav pawh hian nomination a thehluh ve tho thu a sawi. 

Tej Bahadur Yadav hian kum 2017 khan YouTube-ah sipaite hnena chaw sem ṭhin a sawiselna video chu a dah a, indona hmuna awm sipaite chu dailuah dal tak leh chhang utte pek an ni, tiin a sawi a ni. He a video hi a darh nasa hman hle. BSF chuan a chungchang ngaihtuah tur hian court of inquiry a din a, home ministry pawhin chhui chiang turin thupek a tichhuak zui bawk. Hemi hnu hian Yadav hi Line of Control aṭangin sawn chhuah a ni a, a hnuah thu dik lo sawiah puhin ban a ni zui ta a ni. 

Varanasa bialah hian Cong­ress chuan an party gene­ral secretary Priyanka Gandhi Vadra an din tir dawn nia sawi a nih hnuah, Gandhi aiah hian kum 2014-a Congress ticket-a lo ding tawh Ajay Rai chu an dah leh ta zawk a ni. Varanasi bialah hian candidate 31 an awm tawh a, Telangana state aṭanga kal, loneitu 50 vel pawhin nomination hi an tihfel tawh rin a ni bawk. Kum 2014 inthlanah khan Varanasi bialah hian candidate 42 an awm a ni.