'NYAY' hi Indian economy engine tana diesel a ni: Rahul

Congress president Rahul Gandhi chuan an party-in sorkarna an siama kalpui an tiam, minimum income gua­ran­tee scheme, NYAY chu Indian economy tan chuan khawl tana diesel pawi­mawh ang hi a ni, a ti. 

Rahul Gandhi chuan Congress-in sorkar a siam chuan kum khat chhungin ṭhalai nuai 22 tan hna siamsak a tiam a, panchayat-ah hnathawktu mi nuai 10 a tiam bakah, loneitu an loan lak rul thei lote jail-ah tantir an ni lo ang, a ti.

Thawhṭanni-a Rajas­than-a Dholpur district-a rally a neihnaah, Gandhi chuan kum nga chhungin ramchhung hmeichhia, mi vaibelchhe nga-te account-ah cheng nuai 3.60 an dahsak dawn tih a sawi. Narendra Modi-an mipuite bank account hawn tir a, pawisa eng zat mah a dah luh sak leh si lo ang kha an ni dawn lo tih a sawi. PM-in ramchhung mipui zawng zawngte bank account-a Rs. nuai 15 dahsak a tiam chu dawt leh thil theih loh a nih thu a sawi. 

Congress party chuan NYAY scheme hnuai­ah hian ramchhunga mi rethei chhungkuate hnenah kumtin Rs 72,000 pek a tiam a ni. NYAY scheme siam dawnin economist ṭha rualte pawh an rawn thu leh, ram economy-a nghawng pawi nei loa mi rethei chhungkuate hnena ṭanpuina sum pek an duh tih a sawi a ni. 

Rahul Gandhi chuan India rama unemployment rate chu kum 45 chhunga a san lai ber a ni tih sawiin, sorkar hna nuai 22 zet chu hnawh khah lohin a awm tih a sawi bawk. Thuneihna an chan chuan heng hna ruakte hi kum khat chhunga hnawhkhah an tum tur thu a sawi bawk.