Gadchiroli attack : Naxal bomb tihpuahah sipai 15 thi Pawikhawihtute dimdawi an ni dawn lo : Modi

Nimin chhun dar 12:30 vel khan Gadchiroli, Maharashtra-ah hel pawl Naxal-te'n sipai chuan­na motor chu bomb chak tak hmangin an bei a, sipai 15 an thih bakah driver pakhat a thi tel bawk. 

He thil thleng hi Prime Minister Narendra Modi chuan pawi a tih thu sawiin, pawi khawihtute chu dimdawi an ni dawn lo tih a sawi. Hel kuta thite hi Gadchiroli police, Quick Response Team (QRT)-te an ni a, helte hian an patrolling area huamchhung, Kurkheda-Korchi road-ah an lo lambun a ni. Motor-ah hian mi 16 an chuang a, an zinga 15-te hi sipai niin, bus khaltu chuan nunna a chan bawk. Sipaite hian fimkhur thilah private bus an hmang a, mahse helte hian an lo lambun ta tho a ni.  

Gadchiroli-ah hian kar thum liamta vel khan polling booth-ah bomb chak tak a lo puak tawh bawk a, he lai hmunah hian Naxal leh police-te hi tun hnaiah an inkap fo bawk. Maharashtra Chief Minis­ter Devendra Fadnavis chuan vanduaina thleng chu pawi a tih thu sawiim, ram tana martar te zahna a hlan. Devendra Fadnavis chuan, "Mi dawihzepte thil tih a ni a, nunna chan chhungte ka tuarpui tak zet a, an tan ka ṭawngṭai a ni," tiin a sawi. CM hian he thilthleng chungchangah hian DGP leh Gadchiroli SP-te a be pawp nghal tih a sawi bawk. 

PM Modi chuan he thil thleng hi na taka chhanlet a nih tur thu a sawi a, Union Home Minister Rajnath Singh pawhin mi dawihzepte thil tih a nih thu leh na taka chhanlet a nih tur thu a sawi bawk. Naxal-te bomb tihpuah hi 27 zet niin an tarlang. Gadchiroli-ah tho hian Thawhlehni zan khan Naxal helte bawk hian Kurkheda tahsil-ah kawng siamna atana hman tur lirthei 29 zet an hal bawk, heng lirtheite hi Chhattisgarh-a Amar Infrastructure Cpmpany Ltd-te ta nia tarlan a ni.