Shiv Sena-in Burqa khap phût

Shiv Sena chuan Muslim hmeichhiaten an hmai an khuhna, Burqa chu vantlang hmuna hman khap an phût. 

Sri Lanka sorkarin Easter Sunday-a an rama pawi­­khawihna thlenga mi 250 chuangin nunna an chan phah hnuah, ram himna tura a hmalakna kawng khat atan vantlang hmun leh puipuina hmunah hmai khuh a khap a, hei hian Muslim hmeichhiaten Burqa an hman ṭhin pawh a huam tel vek a ni. 

Shiv Sena chuan Sri Lanka sorkar thupek tihchhuah hi thlawpin, Sri Lanka tihdan chu zawmin India ramah pawh khap ve turin Prime Minister Nareandra Modi an phût a ni. An pawl chanchinbu, "Saamana" leh "Dopahar Ka Saamana" editorial-ah hemi chung chang hi ziakin, miin a hmai tuamna emaw Burqa emaw a hman tlat chuan ram himna atan pawh a hlauh­thawnawm thei tih sawiin, secuirty force-te tan tunge an nih tih pawh enfiah a harsa dawn a ni, a ti. 

Hetihlai hian BJP MP leh national spokesperson GVL Narsimha Roa chuan Shiv Sena-ten Burqa khap an rawtna chu an thlawp lo tih sawiin, India ramah lo khap ve a ṭulna a awm lo tih a sawi. Union Minister Ramdas Athawale pawhin Sena thil phut hi chhangin, Burqa hmangtu hmeichhiate chu firfiak an ni vek lo tih a sawi. "Burqa hmang hmeichhiate chu firfiak an ni vek lo a, firfiak an lo awm a nih chuan an Burqa chu lakthlak sak an ni mai zawk tur a ni. Burqa hman hi an tihdan phung a nih vangin dikna chanvo pawh an nei a, India ramah lo khap ve ngawt tur a ni lo", tiin a sawi. 

Mahse BJP hruaitu Sadhvi Pragya Singh Thakur-i erawh chuan Sena thil phut hi a thlawp thu a sawi thung a, ram himna ngaihtuahin hei hi tih ve ngei a ngai niin a sawi.