Cyclone Fani : Odisha sorkarin Hmun himah mipui thiar chhuak

Odisha sorkar chuan Ninga­ni khan an state mipui, hmun hniam zawka awmte chu cy­clone Fani-in an state a nuai dawn hnai nia an hriat avangin hmun him lamah an thiarchhuak ṭan.

Cyclone Fani hian vawiin chawhnu lamah hian Puri district-a tuipui kam a thlen rin a ni a, hmun ṭhenkhatah phei chuan ruah tam vak lo a sur ṭan nia tarlan a ni. Official-te chuan mi nuai riat aia tam sawn chhuah an ngai dawn tih sawiin, an tawmhimna tur hmun pawh siamsak an nih tawh thu an tarlang. India Meteorological Department chuan tlai dar 5.30 velah Fani hian Odisha hi an thleng mai thei niin an sawi a, darkar khata km 170-180 vela chakin thlipui hi a thawk dawn niin an tarlang a - 200 kmph thleng pawh a ni thei tih an sawi bawk.

Cyclone hian tuilian pawh a kentel ngei an rin thu sawiin, National Disaster Response Force (NDRF), Odisha Disaster Rapid Action Force (ODRAF) leh State fire service personnel, team 25 chuan hmun him lama mi sawn chhuah hna hi an kalpui a ni. Defence lam pawh an inralring tawh bawk.

Bhadrak leh Vizianagaram station-a rel tlan tur 80 aia tam chu cancel an ni nghal bawk. Cycolne Fani hian Odisha-a district 14 a nuai dawn nia tarlan a ni a, Chief Minister Naveen Patnaik chuan mipuite chu chiai lo tura chahin thuneitute thawhpui turin a chah bawk.