Cyclone Fani-in Odisha a nuai Thi leh hliam eng emaw zat awm

Cyclone Fani chuan Zirtawpni khan Odisha a nuai a, chhiatna nasa tak a thleng. Puri District chu a tuar nasa ber an ni. 

Thlipui hi darkar khata km 150-200 vela chakin a thleh a, he thu ziah lai thleng hian mi pathum an thih tawh bakah, midang eng emaw zatin hliam an tuar bawk. Indian Meteorological Department (IMD) chuan in tam tak a tihchhiat tawh thu leh, electric ban leh thingkung tam tak a len tluk thu an sawi. Thlipui hi a thawk na hle a, hmun himah chhungkaw tam tak sawnchhuah an ni. 

Odisha CM Naveen Patnaik office chuan thuchhuah siamin, hmun hlauhawm nia an hriat aṭangin mi maktaduai khat chuang sawn chhuah an nih thu a tarlang. Ganjam leh Puri-ah mi nuai thum leh nuai 1.3 vel hmun him lamah an sawn tih a tarlang a, eirawngbawlna hmun 5,000 velah an siam thu an sawi bawk. 

He cyclone hi kum 1999-a super cyclone-in Odisha a nuai hnua cyclone tleh na ber  niin mithiamte chuan an sawi lawk a, kum 43 chhunga summertime cyclone na ber a ni tih an sawi bawk.

East Coast Railway chuan rel service an tihtawp thu an puang a, inkalpawhna leh inbiakpawhna a buai nasa hle. Thlawhtheihna service pawh tihtawp lailawk a ni bawk.   

Railways hian Nilaini leh Zirtawpni inkar khan rel service 147 an cancel bawk a ni. Thuneitute chuan passenger-te chu ticket an refund leh vek dawn tih sawiin, ni thum chhunga an refund leh vek tur thu an sawi.

Ministry hrang hrangin hma la nghal

Power Ministry chuan cyclone in a nuaina hmunahte hian a rang thei ang bera electric pek a nih leh theih nan hma an la nghal tih sawiin, drinking water and sanitation ministry pawhin thlipui tuarte awmna hmunah hian tui thlainghlim in tur an supply nghal dawn tih an sawi.

Ministry of food processing industry chuan ei leh intur sem tur an inring sa reng tih sawiin, health ministry pawhin emergency medical team-te an inpeih sa reng tih an sawi bawk. Damdawi an inralrin sa bakah, ṭanpui an ngaih huna che chhuak turin Red Cross-te chu kawng an hawnsak sa reng tih an sawi. Public health response team 17 bakah quick response medical team 5-te chu an inring sa bawk. 

Department of telecommunication chuan thupek tichhuakin cyclone kaihhnawih SMS-te chu a thlawna thawnchhuak thei turin mobile network operator-te an hriattir. Petroleum ministry pawhin petrol leh oil mamawh khawp hman tur a awm theih nan hma an la nghal tih an sawi bawk a ni.  

Indian Coast Guard leh Indian Navy-te chuan chhanchhuah leh chhawmdawl hna thawh nan lawng leh helicopter inpeih sa rengin an dah bawk a, Indian Army leh Indian Air Force-te pawhin an inrin reng thu an sawi.

Ministry of shipping pawhin Paradip Port-a lawng zawng zawng chu an tiding vek tih sawiin, emergency-a hman tur erawh inpeih sa rengin an dah tih an tarlang.

Odisha sorkar chuan district pakuaa thingtlang khua 10,000 vel leh khaw lian pangai 52 velin Cyclone Fani hi an tuar dawn tih sawiin, mipuite chu inchhunga awm turin an chah a ni. Thlipui hian - Ganjam, Gajapati, Khurda, Puri, Jagatsinghpur, Kendrapara, Bhadrak, Jajpur leh Balasore district-te a nuai dawn nia tarlan a ni. West Bengal-a East and West Medinipur, South and North-24 Parganas, Howrah, Hooghly, Jhargram leh Kolkata dis­trict-te pawh a nuai dawn nia tarlan a ni bawk.

Andhra Pradesh-a Srikakulam, Vizia­nagaram leh Visakhapatnam district-te pawh a nuai rin a ni bawk. Cyclone hian West Bengal lam hi a pan zel nia sawiin thli hi a na nep telh telh dawn tih tarlan a ni a, vawiin chawhnu lam hian Bangladesh a thlen tawh rin a ni a, darkar khata km 60-70 vela nain Bang­ladesh-ah hi chu a thleng rin a ni bawk. 

Prime Minister Narendra Modi chuan Odisha tan hian ṭanpuina tam tham tak pek a nih tur thu a sawi a, hman lailawk turin  vaibelchhe 1,000 chu hlan nghal an ni.