PM Modi-a'n "Azadi Ka Amrut Mahotsav" a hawng

Sorkar laipuiin India zalenna champha vawi 75-na a lawm bul ṭanna atan prime minister Narendra Modi chuan nimin khan Ahmedabad-ah  "Azadi Ka Amrut Mahotsav" event a hawng. 

Kum 2022 hi India-in zalenna a hmuh champha kum 75-na a ni a, hemi puala lawmna hi nimin aṭang khan neih ṭan niin, kum 2023, August 15 neih chhunzawm a ni dawn tih PM Modi chuan a sawi.  

Modi hian nimin khan Ahmedabad hi panin, airport aṭangin Sabarmati Ashram a pan nghal a, Mahatma Gandhi zahna pangpar a dah. Kum 1918-1930 chhung Mahatma Gandhi leh a nupui, Kasturba te chenna, Hriday Kunj pawh a tlawh nghal bawk. 

Sorkar laipui chuan India zalenna champha vawi 75-na lawmna atan hian thil hrang hrang buatsaih a tum. Nimina Sabarti Ashram-a Azadi Ka Amrut Mahotsav event chu a lawm bul ṭanna niin, March 12 chu kum 1930-a Mahatma Gandhi'n Dani March an neih ni a nih avangin India ram tana ni pawimawh tak a nih thu PM Modi chuan a lo sawi tawh a ni. 

PM chuan Mahotsav chu India zalenna sualtute zahna lantirna a ni tih sawiin, Mahotsav pual hian Dandi March hriatreng nan ni 25 awh tur 'padyatra' (foot march) chu Ashram aṭangin a vailiam nghal bawk. Padyatra hi Ashram aṭangin Dani, Navsari thleng neih a ni dawn a, km 386-a thui niin, mi 81-ten kum 91 liamtaa Mahatma Gandhi hoa kawng a lo zawhna hi zawh ve lehin, April 5-ah Dandi an thleng ang.