Inthlan neihna tur state-ah PM thlalak chuanna Covid Vaccination Certificate pekchhuah khap
Election Commission of India-in a hriattir angin, union health ministry chuan assembly inthlan neihna tur - West Bengal, Tamil Nadu, Assam, Kerala, Puducherry Union Territory-ah Covid-19 late hnena Vaccination Certificate pek chhuahah prime minister Narendra Modi thlalak chuan tir a ni tawh dawn lo tih a sawi.
Covid Vaccination Certificate-a PM Modi thlalak dah tel a nih chungchang hi Trinamool Congress chuan Election Commission-ah complaint-in, Model Code of Conduct bawhchhiatna a nih thu an sawi. Hemi hnu hian EC chuan union health ministry hnenah hemi chungchangah hian PM thlalak hi inthlanna neihna tur state-ahte chuan dah tel tawh lo turin a ti a ni.
Union health secretary Rajesh Bhushan chuan EC ngenna hi zawmin, inthlanna neihna tur bik state/UT panga-ah Co-WIN filter siam a ni a, vaccine late hnena certificate pekah PM thlalak hi dah tel a ni tawh dawn lo tih a sawi. TMC hruaitu Derek O'Brien chuan EC-a lehkha a thehluhah, Ministry of Health and Family Welfare-in certificate a pekchhuahah PM thlalak, hming leh a thuchahte dah tel a ni chu a dinhmun leh thuneihna mawi lo taka hmanna, leh Covid vaccine siamtuten hmingṭhat an hlawh vena tur lo ruksakah a puh.