India ram aiin Brazil-ah hripui kai an tam tawh zawk
Worldometre data aṭanga a lan dan chuan India ram aiin Brazil ramah Covid-19 hripui kai an tam tawh zawk a, tunah chuan US tih lohah chuan Brazil-ah hian hri kai an tam ber tawh a ni.
Brazil-ah hian Inrinni khan hri kai hmuh chhuah thar mi 76,178 lai an awm a, mi 1,997-in an thihpui leh bawk. An rama Covid-19 hri kai hmuhchhuah tawh hi mi 11,439,250 lai a awm tawh a, mi 2,77,216-in an thihpui tawh bawk.
India ramah erawh Inrinni khan hri kai hmuh chhuah thar 25,320 awmin mi 161-in an thihpui a ni. India ramah chuan Covid-19 case 1,12,59,048 a awm tawh a, mi 1,58, 607-in an thihpui tawh a ni. Hri kai mek 2,10,544 la awmin hri kai tawh zinga mi 1,09,89,897 chu an dam leh tawh.
Thla thum hnua hri kai thar tam ber ni
Inrinnia ram chhunga hri kai hmuhchhuah zat hi ni 84 hnuah ni khata hri kai thar an tam ber ni a ni. Nikum December 20 khan hri kai hmuh chhuah thar mi 26,624 an awm a ni. Hri kai thar an pung chho leh mek a, hei vang hian recovery rate pawh Inrinni zinga 96.82% ni chu nimin khan 96.75% ah a tlahniam.
Inrinnia Covid-19 hripui vanga thi, mi 161 zinga 84.47% chu state paruka mi an ni. Hripui thihpui zinga 88 chu Maharashtra state ami an ni a, Punjab-ah mi 22 leh Kerala-ah mi 12 in an thihpui bawk. Hetih lai hian hemi ni vek hian state/UT 14-ah hri vanga thi an awm lo.
Ram puma hri kai mek chu hri kai hmuhchhuah tawh aṭanga 1.78% an ni a, an zinga 87.72% chu state pasarih - Maharashtra, Kerala, Punjab, Tamil Nadu, Madhya Pradesh, Karnataka leh Gujarat ami an ni. Inrinnia hri kai thar zingah hian Maharashtra-ah mi 15,602, Kerala-ah 2,035 leh Punjab-ah mi 1,510 an awm a ni.
Ram pumah Covid-19 vaccine pekchhuah runpui neih chhunzawm a la ni zel a, vaccine pek chhuah ni 57-na, Inrinni khan mi nuai 15 chuangin vaccine an la a, ni khatah vaccine la an tam ber ṭum a ni bawk.