BJP hruaitu hlui Yashwant Sinha-a'n TMC a zawm

BJP hruaitu hlui, Atal Bihari Vajpayee prime minister-na hnuaia union finance minister pawh lo ni tawh, Yashwant Sinha chuan Inrinni liam ta kha Trinamool Congress (TMC) a zawm. 

Kum 83 mi ni tawh, Sinha hian kum 2018 kumtir lam khan BJP hi a lo chhuahsan tawh a ni. Inrinni khan Sinha hi Kolkata-a Trinamool Bhawan-ah lakluh a ni a, he hunah hian TMC hruaitu Derek O'Brien, Sudip Bandophadhyay leh Subrata Mukherjee te pawh an tel. Lakluh a nih hma hian chief minister Mamata Banerjee pawh a chenna inah a hmu a ni. West Bengal Assembly inthlan neih dawn hnaih taka Sinha'n TMC a zawm hi CM Banerjee kaihhruai party tan thil lawmawm tak a ni. 

TMC member atana lakluh a nih hnua thu a sawiah Sinha chuan, "Kan ram hian dinhmun ṭha lo tak a hmachhawn mek a ni. Democracy dinhmun a derthawng mek a, institution hrang hrang, judiciary thleng pawhin an chak tawk tawh lo a ni," tiin BJP sorkar dik lohna lo dang tur an awm lo niin a sawi. Ajal Bihari Vajpayeee hunlaia BJP chuan inlungrualte a ngai pawimawh a, mahse tuna BJP sorkar ding mek chuan midangte rahbeh leh hneh chu a thupui tawh zawk a ni, a ti. 

Sinha hi kum 1990 khan union finance minister niin, prime minister hlui Chandre Shekhar hnuaiah kum 1991, June thleng khan he dinhmun hi a chelh a ni. A hnuah December, 1998 - July, 2002 chhung khan PM hlui Vajpayee hnuaiah finance minister atan dah a ni leh a, a hnuah May, 2004 thleng khan foreign minister a ni leh bawk.

IAS officer 1960 batch niin, Sinha hian sorkar hna bansanin kum 1984 khan Janata party a zawm a, a hnuah BJP-ah a lut leh a ni. Mahse BJP hruaitu hluite thlak chhoh an nih hnuah Sinha pawh hian ngaih pawimawh a hlawh lo chho a, hei vang hian prime minister Narendra Modi nen pawh inmil loin a sawisel fo a, kum 2018 khan BJP hi a chhuahsan leh ta a ni.