Mamata-i'n wheelchair-a ṭhu chungin Nandigram a tlawh

West Bengal chief minister leh Trinamool Congress (TMC) chief ni bawk Mamata Banerjee chu nimin chawhnu khan damdawi-ina a awm hnua a hmasa ber atan vantlang hmaah a inlan leh.

March 14, 2007-a police silai hmeh puaha thi Nandigram-a cheng mi 14-te zahna hlanin nimin chawhnu khan Mamata hi a inlan a ni. Mamata Banerjee hi Nandihram assembly seat-ah hian a ding dawn a, Bharatiya Janata Party (BJP) candidate Suvendu Adhikari chu a khingpui ber tur niin April 1 hian West Bengal inthlan thawhnihnaah an inthlang ang.

Nimin chawhnu dar 2 velah khan Mamata chuan twitter-ah,"Chak takin kan do zel dawn a ni! Na tam tak ka la nei a, mahse ka mite natna hian min tina nasa zawk. Kan ram zahawm tak humhimna tura kan donaah hian, thil tam tak an tuar a, kan la tuara zel bawk ang, mahse engtikah mah dawizepin kan awm ngai lo ang," tiin a tweet a ni.

Election Commission chuan CM Mamata Banerjee-in Nandigram-a beih a nih avangin hliam a tuar nia sawi chu a pawm lo a, accident palh vanga hliam niin a sawi. 

Commission hian CM chunga thil thlen dan chungchang report an dawn chu sawihoin, hemi hnu hian Banerjee hian beih a tawh vang ni loin, a vengtu lamte inthlahdah vangin accident a tawk niin a sawi bawk. 

Mamata Banerjee hi Z-plus security pek a nih avangin bullet-proof car-a chuang tur a ni. Mahse a chuang lo a, accident a tawh lai hian a security in-charge zawk chu bullet-proof car chhungah a chuang a, hei vang hian a chungah action pawh lak a ni tur a ni, tiin Commission chuan a sawi a ni.