Vawiinah Lok Sabha inthlan thawh 5-na State 7-a constituency 51-ah vote thlak dawn

Lok Sabha inthlan thawh ngana chu vawiin hian state pasarih-a constituency 51-ah neih a ni leh dawn a, candidate 674 awmin vote nei vaibelchhe 8.75 an awm. 

Inthlan neihna tur state-te chu Bihar (seat 5), Jammu and Kashmir (seat 2), Jharkhand (seat 4), Madhya Pradesh ( seat 7), Rajasthan (seat 12), Uttar Pradesh (seat 14) leh West Bengal (seat 7) te a ni. Inthlan thawh nga-na neihna turah hian candidate 674 an awm a, an zinga 12% chu hmei­chhia an ni. Association for Democratic Reforms (ADR) in candidate 674 zinga 668-te affidavit thehluh a zirchianna aṭangin, an zinga 149 chu national party candidate niin, state party aṭangin candidate 31, registered unrecognized party aṭangin 236 leh independent candidate 252 an awm a ni. Candidate zinga paruk erawh chuan affidavit thehluh kim loh vangin Election Commmission of India website-ah upload a ni ve lo. 

Candidate zinga 126 chu cri­mi­nal case nei lai an ni a, BJP candi­date zinga 46%, Congress can­di­date 31%, Bahujan Samaj Party (BSP) candidate 27% leh Sama­jawadi Party candidate 78% bakah independent candidate zinga 10% chu criminal case nei lai an ni. 

Mi hausa tawntaw, crorepati 184 (28%) candidate zingah hian an awm. Cheng vaibelchhe khat chuang nei candidate hi BJP in 79%, Congress-in 71%, BSP-in 52%, SP-in 89% leh independent candidate 12 % an nei. Inthlan thawh nganaa candidate zinga hausa ber chu Uttar Pradesh-a Lucknow bial SP candidate Poonam Shatrughan Sinha niin cheng vaibelchhe 193 a nei. 

Candidate 264 chu zirna lamah Class 5 - 12 inkar an ni a, graduate leh a chunglam mi 348 awmin, candidate 43 chu ziak leh chhiar thiam tia inziak an ni a, hetihlai hian candidate zingah ziak leh chhiar thiam lo paruk an awm bawk. 

Bihar-a Lok Sabha bial panga -  Sitamarhi, Madhubani, Muza­ffarpur, Saran leh Hajipur-ah vote thlak a ni dawn a, candidate 82 awmin an zingah hmeichhia panga an tel. Candidate zingah hian Union Minister hlui Rajiv Pratap Rudy, Pashupati Kumar Paras leh Chandrika Roy-te an tel. Inthlanna muanawm tak a awm theih nan Indo-Nepal border-te khar a ni. Vote nei mi maktaduai 89.09 awmin, vote thlakna tur polling station 9,976 siam a ni. Kum 2014 Lok Sabha inthlanah khan vawiina vote thlakna tur bial panga zinga pahnih-ah BJP-LJP thawkdun an chak a, RJD-in seat hnih leh Congress in seat khat an la bawk. Bihar-ah hian BJP kaihhruai NDA leh Congress-RJD kaihhruai eptu ṭangrual pawl, Mahagatthbandhan-te chu inbei tawk hle tura ngaih an ni. 

Jammu and Kashmir-ah chuan Ladakh bial leh Anantnag bial huamchhunga Pulwama leh Shopian district-ah inthlan hi neih a ni ang. Anantnag bial bikah inthlan muanawm taka neih a nih theihna turin a bial chhunga district hrang hrangah inthlan hi thawh thumin kalpui a ni. Vote nei mi 76,97,498 awmin polling booth 1,254 a awm a, candidate 22 an awm. 

Jharkhand-a bial pali-ah inthlan­na neih a ni dawn a, vote nei mi nuai 65 chuang awmin polling station 8,834 siam a ni. Candidate 61 an awm a, an zingah hian Union Minister of State for Civil Aviation Jayant Sinha pawh a tel. Polling station 918-ah webcasting facility dah a ni a, Election Commission chuan inthlan buaipui tur hian polling personnel 39,909 leh micro observer 1,191 a dah a ni. 

Madhya Pradesh-a bial pasarih-ah vote thlak a ni dawn a, hei hi an state-a vote thlak thawh hnihna tur a ni. Candidate 110 awmin an zingah hian hmeichhia pakua an tel. Vote nei vaibelchhia 1.20 an awm. Polling booth 15,240 siam a ni. Inthlan thawh nga-na neih rual hian Election Commission chuan April 29-a vote thlak tawhna, Demha khuaa polling booth 185-ah chuan thil dik tawk lo a awm vangin vote thlakṭha turin a ti bawk. Vawiina vote thlakna tur Rewa leh Satna bialahte hian candidate 23 leh 21 an awm. Madhya Pradesh hian Lok Sabha seat 29 neiin, kum 2014 inthlan­ah khan BJP chuan seat 27 lain Congress-in seat hnih a la ve a ni. 

Rajasthan-a Lok Sabha seat 12-a inthlan neih turah hian candidate 134 an awm a, an zingah hmeichhia 16 an tel. Polling station 23,783 siam a ni a, vote nei 2,31,79,623 an awm. Vawiina inthlan neihna tur bial pali chu SC tana reserved niin ST tan bial khat dah a ni bawk. 

Uttar Pradesh-a Lok Sabha bial 14-a inthlan neih tura candidate zingah Congress president Rahul Gandhi, Union Home Minister Rajnath Singh leh  UPA chairperson Sonia Gandhi-te an tel a ni. Vawiina inthlanna neihna bial 14-ah hian kum 2014 inthlanpuiah khan BJP chuan Sonia Gandhi-te nufa bial, Raebareli leh Amethi tih loh chu an la vek a ni. Kuminah hian heng bial pahnihah hian SP-BSP-RLD ṭangrual chuan candidate hran siam loin Gandhi-te nufa hi an thlawp a ni. UP-a inthlanna neih turah hian candidate 182 an awm a, vote nei 2,47,09,515 awmin polling booth 28,072 siam a ni. 

West Bengal-a Lok Sabha bial panga-a inthlanna neih turah candidate 83 awmin vote nei mi 1,16,91,889 an awm a, vote thlakna tur polling station 13,000 siam a ni. Bongaon (SC), Barrackpur, Howrah, Uluberia, Serampore, Hooghly leh Arambagh (SC) seat-a inthlan neih turah hian boruak muanawm tak a awm theihna turin venhim hna thawktu, central force 578 zet dah an ni. Heng bial panga-ah hian Trinamool Congress, BJP leh CPI(M)-te chu inbei ber tur an ni.