PM-in thlipui tlehna hmun enfiah

Prime Minister Narendra Modi chuan nimin zing khan thlawhtheihna hmangin Cyclone Fani tlehin Odisha state-a chhiat­na a thlen dante a en kual. Thlipui tlehin chhiatna a thlenah hian mi 30 chuang an thi a ni. 

PM Modi chuan Odisha Chief Minister Naveen Patnaik chu an state-a chhiatna thlenga hma a lak danah a fak a, hna ṭha takin a thawk tih a sawi. Odisha ṭanpuina tur hian cheng vaibelchhe 1,000 pek a nih thu a puang nghal bawk.

Narendra Modi chuan, "Inthlan buai lai a ni chungin Odisha sorkar chuan chhiatna tawkte chhawmdawl leh ṭanpui hna thawh chu a dah pawi­mawh ber a, hemi kawngah hian state sorkar, thuneitute leh chhawmdawl hna thawhnaa tha thawhtu zawng zawngte lawmpuina ka hlan duh a ni. Hna ṭha takin an thawk a, sorkar laipui leh state sorkar inkarah thawhdunna ṭha tak a awm a ni," a ti. 

Thlipuiin chhiatna a thlenna hmun hrang hrangte a enkualna-ah PM hi CM Patnaik chuan a ṭawiawm a, an en zawh hnuah Modi chuan state hotute chu review meeting a neihpui leh nghal a ni. Modi chuan, "Tualchhung mipui, a bikin sangha mantute an fakawm hle a ni. Mipuite chu an in chhuahsan tura hriattir an nihin an hnial fo ṭhin a, mahse tun ṭumah chuan Odisha mipuite chuan ram pum hnenah emergency thila chet lak dan tur dik tak an entir a ni. Odisha mipuite pawh thuneitute ṭha tak an thawhpui avangin lawmthu ka hrilh nghal a ni", a ti bawk. 

Odisha state-ah hian thlipui tleh tur avangin mi maktaduai khat dawn chu hmun him lamah sawn chhuah an ni a, an awm lailawkna tur hmun 5,000 vel zet siam a ni. Heng mite sawnchhuah hna hi bus 1,500 chuang hmanga thawh niin, sorkar hnathawk leh volunteer sing telin an pui a ni. 

PM chuan Odisha ṭanpuina tur hian cheng vaibelchhe 1,000 pek a nih tur thu a puan bakah, thlipui tleha thi chhungte chu cheng nuai hnih ṭheuh leh hliam tuarte Rs. 50,000 ṭheuh pek an nih tur thu a sawi. Sorkar laipui  hian kar kal ta khan Odisha Response Fund atan cheng vaibelchhe 381 a pek thu a lo puang tawh bawk.