BSF sipai hluiin candidate aṭanga hnawlna SC-ah khing
Sipaite hnena ei tur sem ṭhin a sawiselna video social media-a a thehdarh avanga sipai aṭanga ban, Border Security Force (BSF) jawan Tej Bahadur Yadav chuan Lok Sabha inthlana chuh a tumna chu Election Commission-in a hnawlsak avangin Supreme Court-ah a khing.
Tej Bahadur Yadav hian Uttar Pradesh-a Varanasi bialah Prime Minister Narendra Modi khin tumin nomination a thehlut a, mahse hei hi hnawlsak a ni. Yadav hi Samajwadi Party hmingin din a tum a, mahse returning officer chuan nomination paper a thehluhah sipai aṭang hian eiruk leh rinawm loh vanga ban a ni lo tih finfiahna a thehluh tel loh avangin hnawlsak a nih thu a sawi.
Hetihlai hian Yadav chuan poll panel chu inthliarna kalpuiah puhin, a thutlukna siam dan chu thil awmze nei lo tih a sawi. Evidence thehluh tura hun an pek chhungin a pe lut hman a, heti chung hian candidate a nihna chu hnawlsak a ni tho a ni, a ti. Hetih lai hian EC chuan Yadav hian nomination paper pahnih a thehluhah sipai aṭanga a banna chhan hi a inang loin a sawi tih a tarlang thung. Yadav hian SP candidate leh independent candidate turin a thehlut ve ve a ni.
Varanasi bialah hian nomination paper 119 zet thehluh a ni a, hengte hi enfiah a nih hnuah a tam zawk chu hnawl an ni. Heti chung hian candidate 31 an awm dawn a, an zingah hian PM Modi bakah Congress candidate Ajay Rai leh Samajwadi Party candidate Shalini Yadav-te an tel. Kum 2014 Lok Sabha inthlanah khan Modi hian amah hnaih bertu, Aam Aadmi Party hotu Arvind Kejriwal chu vote nuai 3.71 zetin a hneh a ni.