Mawi lo taka chea puhna lakah CJI fihlim Activist leh lawyer-te lungawi lo

Mipat hmeichhiatna lam hawia a hnuaia thawk ṭhin laka mawi lo taka chea puh, Chief Justice of India (CJI) Ranjan Gogoi chu a chungchang chhuitu, inquiry panel chuan he puhna lakah hian a fihlim tih a sawi. 

Member pathum awmna, in-house inquiry panel hi CJI Gogoi-a'n a din a ni a, Supreme Court-a thawk ṭhin hmeichhe pakhatin a chungah mawi lo taka chea a puhna chungchang hi an chhui a ni. Nimin khan Justice SA Bodde kaihhruai panel chuan Chief Justice leh senior judge hnenah report hi a thehlut a ni. Report-ah hian Supreme Court-a thawk ṭhin hmeichhe pakhatin April 19-a CJI a puhna chungchang chu finfiahna tur rintlak a awm lo tih sawiin, mipui hriata puanzar tlak pawh a ni lo tih a sawi. Panel-ah hian Justice Indira Barnerjee leh Indu Malhotra te pawh an tel. 

Supreme Court-a thawk ṭhin hmeichhe pakhat chuan SC judge 22-te hnenah affidavit theh lutin, Justice Gogoi hian nikum October thlaa CJI atana lak luh a nih hnu lawk khan, mawi lo takin a khawih tiin a puh a ni. A chetdan chungchang hi a sawichhuah hnuah ban a ni tih a sawi bawk. 

Inquiry panel chuan he hmei­chhiain CJI a puhna chungchang hi chhui zuiin, hearing pawh vawi thum an nei. Mahse hmeichhia hi April 30-a hearing vawi thumna an neih hnu khan inhnukdawkin, rorelna dik a hmu thei dawn loa a hriat thu a sawi. Panel hmaah hian CJI pawh hi a inlan a, a staff hluiin a puhna chu thu dik lo a ni tih a sawi. 

Hetih lai hian panel-in CJI a thubuaia a fihlim tir avang hian activist leh lawyer eng emaw zat chu lungawi loin court tualah an pungkhawm. SC staff hlui tana rorelna dik phuta lungawi lohna lantirnaa tel hmeichhe 30 te chu hren zui an ni bawk. Lungawi lohna lantir a nih avang hian venhimna pawh tihkhauh nghal a ni a, paramilitary police eng emaw zat tirh belhin, pungkhawmte hnawhdarh nan hian water cannon hman a ni. Court pawn lamah hian IPC Section 144 puan nghal a ni a, mi panga aia tam pun khawm khap a ni. 

National Federation of India Women (NFIW) general secretary Annie Raja chuan in-house inquiry panel-in Ranjan Gogoi puhna an chhui leh ngaihtuah dante, an puhna laka a fihlim tir danah eng method nge an hman tihte an hriat duh avanga lungawi lohna hi lantir an nih thu a sawi. Rorelna dik taka kalpui chu an duh ber a nih thu a sawi bawk.