SC-in eptu hruaitute ngenna hnawl

Supreme Court chuan eptu party hrang hrang 21 hruaituten Lok Sabha inthlan neih mekah vote thlakna, po­lling booth tina Voter Veri­fia­ble Paper Audit Trail (VVPAT) a paper slip 50% tal chhiar tel tura ngenna an siam nawn leh chu a hnawlsak. 

Chief Justice Ranjan Gogoi-a kaihhruai SC bench chuan VVPAT slip chhiar tur zat thupek a lo siam tawh chu tihdanglam a tum lo tih a sawi. SC hian assembly bial tina EVM pakhatah VVPAT slip chhiar tel tura a lo tih chu eptute ngenna avang hian EVM panga zelah chhiar turin a lo tihbelh tawh a ni. Hemi hnuah eptute hian a thupek hi ngaihtuah nawn leh tur leh, VVPAT 50% tal chhiar turin an ngen leh a ni. 

Andhra Pradesh CM leh TDP hotu Chandrababu Naidu kaihhruai eptu party 21-te chuan SC hnenah a thupek lo siam tawh ennawn leh tur hian ngenin, VVPAT panga chhiar tura tih chu a la lungawi thlak tawk loa an ngaih thu an sawi a ni.