Ni 48 hnuah Ghazipur ramri hawng leh

Loneitute'n Farm Law an duh lohna lantira nawrh an huaihawt vanga ni 48 chhung lai lirthei tlan phal a nih loh hnuah nimin khan New Delhi-a Ghazipur ramri chu lirthei tlan theih turin hawn a ni leh ta.

Lirthei tlan hi phal tawh mah se national capital aṭanga Uttar Pradesh lama tlan chiah an la phal thung a ni. Delhi Police leh Ghaziabad dis­trict police official-te'n in­biak­na an neih hnuah Natio­nal Highway-24, Delhi aṭanga Ghaziabad lama lirthei tlan hi phal a ni leh ta a, Delhi Police-te chuan nimin khan thuchhuah an siamah," Ghazipur ramri leh mipui remchan dan thlir chunga dan leh thupek chungchang uluk taka ngaihtuah a nih hnuah Delhi aṭanga Ghaziabad panna NH-24 chu Ghaziabad District, Uttar Pradesh police official-te nen inbiakna neih a nih hnuah hawn a ni leh ta," tiin an tarlang.

Nikum November 26 aṭanga loneitute'n nawrh an huaihawtna hmun zingah khan Ghazipur ramri hi a tel a, December 3 khan he ramri hi khar hmasak ber a ni a, hemi hnuah hian hawn ni leh mah se January 26, Republic Day-a buaina a chhuah avang khan khar zui leh a ni.