West Bengal election : BJP an chak chuan road project lian tak siam tum

Union minister for road transport and highways Nitin Gadkari chuan West Bengal assembly inthlan neih turah Bharatiya Janata Party (BJP) thlan tlin an nih chuan road project, cheng vaibelchhe nuai khat hu siam a tiam. 

Nitin Gadkari chuan BJP an chak chuan Rs vbc nuai khat hu road project hi an hawn ngei tur thu sawiin, "Ram neiin, forest environment clearance nei ila chuan tunah pawh kan ti thei nghal tur a ni. He project kalpui tur hian kan inpeih reng a, mahse harsatna kan tawk a ni. Central leh state-a thuneihna changtu party in ang a nih chuan, Bengal  hmelhmang hi kan thlak danglam thei dawn a ni," a ti. 

West Bengal assembly inthlan neih turah hian state-a rorellai, chief minister Mamata Banerjee kaihhruai Trinamool Congress (TMC) party leh BJP hi an inbei na sawt hle. Seat 294 awmna, assembly inthlan in March 27 aṭanga nei ṭan a ni dawn a, thawh riata neih tum niin, April 29-ah a thawh riatna neih a ni dawn a ni. Vote tlate hi May 2-ah chhiarin result puan nghal a ni bawk ang. 

Union home minister Amit Shah pawhin nimin khan West Bengal-ah Jhargram-a an party rally chu virtual hmangin a hmanpui a, BJP an chak chuan Jhargram-ah tribal zirlaite tihmasawnna turin Pandit Raghunath Murmu Tribal University an din tur thu a sawi. 

Amti Shah chuan, "Tribal mi zirlai, class 12 exam-a 70% chin hmute chu an zir zawm zelna atana an sum mamawh 50% kan pe dawn a ni. Stand Up India Scheme hnuaiah tribal hnamte puihna turin BJP sorkar chuan cheng vaibelchhe 100 a dah ang," a ti. 

Union Minister hi nimin khan Jhargram hi kal a tum a, mahse a kalna tur helicopter a chian loh avangin a hmunah a kal thei ta lo a, virtual hmangin thu a sawi ta a ni.